Ráðherra fylgist með karlalandsliðinu í körfuknattleik í Póllandi

Guðmundur Ingi Kristinsson, mennta- og barnamálaráðherra, er staddur í Katowice í Póllandi til þess að fylgjast með Evrópumóti karla í körfubolta. Fjöldi Íslendinga er á mótinu til þess að styðja landsliðið.

Ráðherra nýtti tækifærið og heimsótti Auschwitz-Birkenau fangabúðirnar sem Pólverjar hafa gert að safni til minningar um skipulagðar þjóðernishreinsanir Nasista í síðari heimsstyrjöldinni. Einnig hitti hann forystufólk Körfuknattleikssambands Íslands (KKÍ) og fékk kynningu á starfi og skipulagi sambandsins í tengslum við mótið. Þá hitti hann forseta Evrópska körfuknattleikssambandsins Jorge Garbajosa.

Íslenska liðið hefur tapað naumlega fyrstu leikjum sínum á mótinu.

„Það hefur verið gaman að upplifa þá miklu stemningu sem hefur myndast hér hjá Íslendingum á mótinu. Einnig er frábært að sjá hversu miklar framfarir hafa orðið í íslenskum körfubolta undanfarin ár sem gera það að verkum að við spilum jafna leiki á lokamótum sem þessu við bestu lið heims,“ segir Guðmundur Ingi Kristinsson, mennta- og barnamálaráðherra.

Kristinn Albertsson formaður KKÍ, Willum Þór Þórsson forseti ÍSÍ, Guðmundur Ingi Kristinsson ráðherra íþróttamála, Jorge Garbajosa, forseti Evrópska körfuknattleikssambandsins, Hannes S. Jónsson framkvæmdastjóri KKÍ og Andri Stefánsson framkvæmdastjóri ÍSÍ