Pétur U. Fenger skipaður skrifstofustjóri í innanríkisráðuneytinu

Pétur U. Fenger hefur verið skipaður skrifstofustjóri í innanríkisráðuneytinu. Pétur stýrir skrifstofu fjármála og rekstrar.

Staða skrifstofustjóra skrifstofu fjármála og rekstrar var auglýst laus til umsóknar 9. janúar með umsóknarfresti til 26. janúar. Meðal helstu verkefna skrifstofunnar eru eftirlit með rekstri stofnana ráðuneytisins, fjárlagagerð, rekstraráætlanir, framkvæmd fjárlaga og fleira. Alls bárust 44 umsóknir um embættið og var skipuð þriggja manna hæfnisnefnd til að vera ráðherra til fulltingis við undirbúning skipunar í embættið sbr. 18. og 19. gr. laga um Stjórnarráð Íslands nr. 115/2011. Í nefndinni sátu Bjarni Snæbjörn Jónsson, ráðgjafi sem jafnframt er formaður nefndarinnar, Arney Einarsdóttir, lektor við viðskiptadeild Háskólans í Reykavík og Þórhallur Vilhjálmsson, aðallögfræðingur Alþingis.

Pétur U. Fenger lauk viðskiptafræðiprófi frá HÍ 1980 og starfaði meðal annars sem bæjarritari í Mosfellsbæ og framkvæmdastjóri hjá Almenningsvögnum, sem varð hluti af Strætó bs. árið 2001. Þar starfaði Pétur sem aðstoðarframkvæmdastjóri til ársins 2007 þegar hann hóf störf  í fjármálaráðuneytinu.