Vinnustofa um EES-samninginn og framkvæmd hans
Innanríkisráðuneytið efndi nýverið til vinnustofu um EES-samninginn og framkvæmd hans. Var hún skipulögð í samvinnu við Alþingi, EFTA-skrifstofuna í Brussel og utanríkisráðuneytið. Vinnustofuna sátu fulltrúar frá ráðuneytinu og stofnunum þess sem sinna EES-málefnum.
Aðal umfjöllunarefni vinnustofunnar var að fjalla um EES-samninginn og framkvæmd hans á vettvangi ráðuneytisins út frá sjónarhóli þeirra aðila sem koma að rekstri hans, þ.e. Alþingis, ráðuneytisins og stofnana þess auk EFTA skrifstofunnar í Brussel.
Aðalfyrirlesarar voru þau Valgerður Guðmundsdóttir og Thomas Tzieropolos, sérfræðingar EFTA-skrifstofunnar í Brussel, og fluttu þau erindi um starfsemi skrifstofunnar og ferla ESB-gerða í mótun og hvaða tækifæri EFTA ríkin hafa til áhrifa. Einnig fluttu erindi þeir Sigurbergur Björnsson, skrifstofustjóri í innanríkisráðuneyti, og Gunnar Örn Indriðason, lögfræðingur á skrifstofu innviða, sem ræddu verkaskiptingu ráðuneytis og stofnana og um mat á efni og áhrifum gerða. Einnig flutti Sesselja Sigurðardóttir, lögfræðingur á Alþingi, erindi um aðkomu þingsins að EES-málum í samræmi við reglur um þinglega meðferð slíkra mála.
Vinnustofan var vel sótt og sátu hana fulltrúar flestra stofnana ráðuneytisins sem vinna að innleiðingu EES-gerða og voru góðar umræður um efnið á milli erinda.
